Batang Pinoy at PNG inihahanda ng PSC para sa 2022

MANILA, Philippines — Nailatag na ng Philippine Sports Commission (PSC) ang health and safety protocols para sa posible nilang pagdaraos ng Batang Pinoy at Philippine National Games (PNG) sa susunod na taon.

Ito ay sa kabila ng inaasahan pa ring pagharap ng bansa sa coronavirus disease (COVID-19) pandemic.

“The protocols are already in place. Medyo mahirap talaga, may kahirapan, but if they were able to do it in Tokyo, we can do it also now,” sabi ni PSC Commissioner Ramon Fernandez.

Matagumpay na naisagawa ng Tokyo organizers ang nakaraang Olympic Games noong Hulyo sa kabila ng pandemya kung saan binuhat ni weightlifter Hidilyn Diaz ang kauna-unahang gold medal ng Pilipinas.

Sinabi ni Fernandez na may medical team rin ang PSC na kasama ng delegasyon sa Tokyo Games na nag-obserba sa ginamit na protocols.

Nagdaos na ang PSC ng consultations at webinars sa mga Local Government Units (LGUs) para sa gagamiting protocols sakaling payagan ng Inter-Agency Task Force (IATF) at Department of Health (DOH) ang pagdaraos nila ng Batang Pinoy at PNG sa 2022.

“I guess in a month or two before the end of the year we should have some decisions already on when to do the Batang Pinoy and the PNG,” wika ni Fernandez.

Dahil sa COVID-19 pandemic ay hindi nai-sagawa ng sports agency ang Batang Pinoy. PNG, Indigenous People’s Games, Children’s Games pati na ang Sports Summit.

“We’re looking forward to the new normal para maituloy na natin iyong sports programs natin lalo na iyong grassroots programs natin,” ani Fernandez.