Harden, Irving malapit nang mapapayag ng Nets

NEW YORK — Nagkaroon ng “positive” contract extension talks ang Brooklyn Nets kina superstars James Harden at Kyrie Irving sa hangaring makabuo ng isang championship-winning roster.

Sinabi ni Nets general manager Sean Marks na halos payag na sina Harden at Irving sa terms ng kanilang mga long-term deals kung saan maaari silang maglaro para sa Brooklyn sa susunod na tatlo at apat na seasons, ayon sa pagkakasunod.

“We’ve had very positive conversations with both of those guys,” ani Marks. “We’re looking forward to sitting down with them over the next two weeks and furthering those discussions.”

Sina Irving at Harden ay bahagi ng “big three” ng Nets kasama si Kevin Durant ngunit nagkaroon ng magkakahiwalay na injury ang tatlo sa nakaraang season.

Hindi nakalaro sina Irving at Harden sa mga krusyal na playoff games laban sa Milwaukee Bucks sa Eastern Conference semifinals series at nasibak ang Nets sa Game Seven.

Tiniyak ni Marks na nakahanda na sina Harden at Irving na sumalang para sa darating na 2021-2022 season na magsisimula sa susunod na buwan.

Pinalakas ng Brooklyn ang kanilang line-up nang dumagdag sa team sina veteran guard Patty Mills, James Johnson at Paul Millsap.