10-Pinoy sumulong sa 3rd round ng US 9-Ball Championship
MANILA, Philippines — Matayog ang lipad ng bandila ng Pilipinas matapos magmartsa sa third round ang 10 Pinoy cue masters sa 2021 US Open 9-Ball Pool Championship na ginaganap sa Harrah’s Resort sa Atlantic City.
Muling umarangkada sina dating world champions Carlo Biado at Dennis Orcollo matapos payukurin sina Vincent Beaurivage ng Canada (9-3) at Paul Spaanstra ng Amerika (9-2), ayon sa pagkakasunod.
Sumama rin sa selebrasyon sina Jeffrey de Luna, Alex Pagulayan at Johann Chua na namayani sa kanya-kanyang karibal sa torneong may nakalaang $50,000 para sa magkakampeon.
Iginupo nina De Luna si Bill Meacham (9-2), tinalo ni Pagulayan si Blake Baker (9-2) at namayani si Chua kay Kelson Juan (9-2) na lahat ay mga Amerikano.
Nanalo rin sina Roland Garcia kay Konrad Juszczynszyn ng Poland (9-6), Jeffrey Ignacio kay Shaun Wilkie ng Amerika (9-4), James Aranas kay John Hennigan ng Amerika (9-4), Roberto Gomez kay Lukas Fracasso-Verner ng Amerika (9-5) at Warren Kiamco kay Justin Espinosa ng Amerika (9-7).
Nakalinya na ang third round matches tampok sina Biado laban kay Mika Immonen ng Finland at Orcollo laban kay Corey Deuel ng Amerika.
- Latest