Potential medal winners lang ang kasama sa AIMAG Philippine team
MANILA, Philippines — Ang mga may potensyal na manalo ng medalya ang bubuo sa Team Philippines na lalaban sa 6th Asian Indoor and Martial Arts Games na nakatakda sa Marso 10-20, 2022 sa Bangkok at Chonburi sa Thailand.
Sasabak ang 160 atleta sa 21 sa kabuuang 31 sports na nakalatag sa 2022 AIMAG na orihinal na itinakda noong Mayo 21-30, ngunit inilipat ng petsa dahil sa coronavirus disease (COVID-19) pandemic.
“We have put together a delegation whose members are all potential for the medals,” sabi kahapon ni Philippine Olympic Committee (POC) president Abraham “Bambol” Tolentino.
Sasalang ang mga Pinoy athletes sa aquatics, 3x3 basketball, billiards, bowling, chess, dancesport, e-sports, indoor athletics, indoor rowing, jiu-jitsu, karate, kickboxing, kurash, muay, pencak silat, sambo, sepak takraw, shooting, skateboarding, taekwondo at wrestling.
“The objective is to ride the momentum of the Tokyo Olympics success and surpass our two gold medals won in the last AIMAG in Turkmenistan in 2017,” ani Tolentino.
Sa huling edisyon ng AIMAG noong 2017 na idinaos sa Ashgabat, Turkmenistan ay nag-uwi ang delegasyon ng dalawang gold, 14 silver at 14 bronze medals.
Ang dalawang ginto ay nagmula kina jiu-jitsu artists Margarita Ochoa (women Ne-waza – 45 kgs) at Annie Ramirez (women Ne-waza -55 kgs), habang may pilak si Tokyo Olympics gold medalist Hidilyn Diaz sa women’s weightlifting.
- Latest
