Bagong equipment para sa mga Paralympians
MANILA, Philippines — Bumili ng mga bagong equipment ang Philippine Sports Commission (PSC) para mapalakas ang tsansa ng anim na national para athletes na makuha ang kauna-unahang gold medal sa Paralympics.
“Malaking pagbabago talaga. Nag-purchase kami ng mga bagong equipment. Hindi lang sa wheelchair, pero lahat sila (para athletes) binigyan namin ng bago,” wika ni PSC Commissioner Arnold Agustin.
Lalahok sina swimmers Ernie Gawilan at Gary Bejino, taekwondo jin Allain Ganapin, wheelchair racer Jerrold Mangliwan, discus thrower Jeanette Aceveda at powerlifter Achele Guion sa Tokyo Paralympics sa Agosto 24 hanggang Setyembre 5.
Pa-Tokyo na ngayon ang delegasyon.
“Pagkatapos ng Rio (de Janeiro, Brazil) Olympics talagang sinabihan namin sila na mag-submit ng kailangan nilang equipment para maging updated tayo,” wika ni Agustin.
Hindi pa nananalo ang Pinas ng Paralympics gold sapul nang lumahok noong 1988 sa Seoul, Korea.
Ang pagkopo ni national weightlifter Hidilyn Diaz sa kauna-unahang Olympic gold ng bansa ang nagsisilbing inspirasyon nina Gawilan, Bejino, Ganapin, Mangliwan, Aceveda at Guion.
“Actually, napakalaking inspirasyon ng outcome ng ating mga abled-bodies athletes sa Tokyo Olympics eh,” ani Agustin. “Doon sila nai-inspire at doon sila humuhugot ng lakas para magpursige sila na magkaroon ng medalya.”
Bilang dagdag na motibasyon ay binigyan ng PSC ang anim na Pinoy Paralympians ng allowance na tig-$3,000 (P150,000).
- Latest