Creamline lumapit sa PVL Open title

MANILA, Philippines — Naitakas ng Creamline ang 25-15, 25-21, 18-25, 19-25, 15-7 desisyon laban sa Chery Tiggo para makalapit sa inaasam na kampeonato sa Premier Volleyball League (PVL) Open Conference kagabi sa PCV Socio-Civic Cultural Center sa Bacarra, Ilocos Norte.

Kumuha ng malakas na puwersa ang Cool Smashers kay opposite hitter Tots Carlos habang nagbigay ng solidong kontribusyon si team captain Alyssa Valdez kabilang ang game winning attack sa fifth set para dalhin ang kanyang tropa sa panalo.

“Parati sinasabi ni coach Tai (Bundit) na we have to re-start every new set. (Pero hindi pa tapos ang series), we’re gonna restart refocus for Game 2,” ani Valdez na pumalo ng 21 kabuuang puntos.

Nakuha ng Creamline ang 1-0 bentahe sa best-of-three finals.

Sa unang laro, itinarak ng PetroGazz ang 25-21, 25-15, 22-25, 25-20 panalo laban sa Choco Mucho upang makalapit sa bronze medal.

Mala-bagyong laro na naman ang inilatag ni Myla Pablo nang magpasabog ito ng 25 puntos — lahat sa attack line — para buhatin ang Gazz Angels sa 1-0 bentahe sa best-of-three, bronze-medal match.