Creamline pinagpawisan sa Perlas

MANILA, Philippines — Dumaan sa butas ng karayom ang reigning champion Creamline bago kubrahin ang  25-12, 22-25, 21-25, 25-20, 15-10 panalo sa Perlas Spikers upang mainit nitong tapusin ang eliminasyon sa Premier Volleyball League (PVL) Open Conference kahapon sa PCV Socio-Civic Cultural Center sa Bacarra, Ilocos Norte.

Sumandal ang Cool Smashers sa solidong laro ni team captain Alyssa Valdez sa fifth set upang dalhin ang kanilang tropa sa 8-1 rekord.

Nakalikom si Valdez ng season-best na 24 points mula sa 22 attacks at dala-wang aces para manduhan ang opensa ng Cool Smashers.

Hindi rin matatawaran ang kontribusyon ni Tots Carlos na humataw ng triple double na 20 points, 21 digs at 12 receptions gayundin sina Jema Galanza na nagdagdag ng 13 hits at Michele Gumabao na gumawa ng 11 markers.

Ang panalo ang nagbigay sa Creamline ng awtomatikong top seeding sa crossover semifinals.

Nanatili sa ilalim ng standings ang Perlas Spikers tangan ang 1-7 baraha.

Kumpleto na ang semis cast — Creamline, Chery Tiggo, Choco Mucho at PetroGazz at magpupuwestuhan na lang.