Velasco nanguna rin sa road race national trials
MANILA, Philippines — Matapos magreyna sa women’s individual time trial (ITT) ay dinomina naman ni Kate Yasmin Velasco ng Philippine Navy-Standard Insurance ang road race event ng PhilCycling National Trials for Road noong Linggo sa Clark Freeport Zone sa Pampanga.
Naorasan si Velasco ng 2:15:17.62 para banderahan ang 80.70-kilometer race at unahan sina Avegail Rombaon (2:15:18.01) at Mathilda Krog (2:15:19.75).
“Thank you so much to my family, supporters, sponsors, coaches and teammates,” wika ng 21-anyos na si Velasco.
Nauna nang nagwagi si Velasco sa women’s ITT sa Day One sa kanyang tiyempong 27:52.814 sa national trials na inorganisa ng PhilCycling na pinamumunuan ni Philippine Olympic Committee (POC) president at Tagaytay City Rep. Abraham “Bambol” Tolentino.
Sa men’s road race, nagtala si Navyman Ronald Oranza ng 3:18:25.80 para pagharian ang 147.6km race kasunod sina George Oconer (3:18:32.15) at Ronald Lomotos (3:18:35.23).
- Latest
