Bucks vs Suns sa NBA finals

ATLANTA — Nakapasok ang Milwaukee Bucks sa NBA Finals sa unang pagkakataon matapos noong 1974 para labanan ang Phoenix Suns.

Muling naglaro na wala si injured star forward Giannis Antetokounmpo, pinatumba ng Bucks ang Hawks sa Game Six, 118-107, para isara ang kanilang Eastern Conference finals series sa 4-2.

Iniskor ni Khris Middleton ang 23 sa kanyang 32 points sa third quarter kung saan kumamada ang Milwaukee ng 44 points kumpara sa 29 ng Atlanta.

“I love it. Each one of these guys, they work every single day. Everybody stays ready. Everybody stays locked in,” ani Middleton. “We all play for each other. And that’s all you can ask for.”

Nagdagdag si Jrue Holiday ng 27 points habang apat pang players ang nagtala ng double figures para sa Bucks.

Ito ang ikalawang sunod na laro na nanatili sa bench ang two-time NBA MVP na si Antetokounmpo dahil sa kanyang knee injury na nangyari sa Game Four.

Inaasahang pamumunuan ni Antetokounmpo ang Bucks sa pagsagupa sa Suns sa NBA Finals na magsisimula sa Miyerkules (Manila time) sa Phoenix.

“One of the biggest things we did the last two games was play for him,” ani Pat Connaughton na nagtala ng 13 points at 8 rebounds. “We do have a true team.”

Nagbalik sa aksyon si star guard Trae Young (bone bruise) para saklolohan ang Hawks ngunit umiskor lamang siya ng 14 markers mula sa 4-of-17 fieldgoal shooting.

Nagtayo ang Milwaukee ng 22-point lead sa third period na naibaba ng Atlanta sa 101-107 agwat sa pagbibida ni Cam Reddish sa huling tatlong minuto ng fourth quarter.

Subalit hindi bumitaw ang Bucks kung saan ang alley oop dunk ni center Brook Lopez ang nag-iwan sa Hawks sa 113-103 sa nalalabing 1:29 minuto.