Ang Clippers puro na
SALT LAKE CITY — Sinandigan ng Los Angeles Clippers ang 37 points ni Paul George para ungusan ang Utah Jazz, 119-111, sa Game Five ng kanilang NBA Western Conference semifinals series.
Bagama’t hindi naglaro si Kawhi Leonard, may knee injury, ay nakuha ng Clippers ang 3-2 abante sa kanilang duwelo ng Jazz.
Nagdagdag si George ng 15 rebounds at 5 assists at may 25 at 21 markers sina Marcus Morris Sr. at Reggie Jackson, ayon sa pagkakasunod.
Nagsalpak ang Utah ng 12 three-point shots sa first half sa pamumuno ni Bogdan Bogdanovic habang hinigpitan ng Los Angeles ang kanilang depensa sa second half.
Tumapos si Bogdanovic na may 32 points tampok ang siyam na triples para sa Jazz at may 21 markers, 5 rebounds at 5 assists si Donovan Mitchell.
Sa Philadelphia, ipinasok ni Trae Young ang tatlong free throws matapos ma-foul sa 3-point line sa huling 1:26 minuto ng final canto para kumpletuhin ang 26-point rally ng Atlanta Hawks sa 109-106 paglusot sa 76ers sa Game Five.
Inangkin ng Hawks, nakahugot kay Young ng playoff-career-high na 39 points, ang 3-2 bentahe sa kanilang serye ng 76ers para makalapit sa Eastern Conference Finals.
Kumamada ang Atlanta ng 40 points sa kabuuan ng fourth period kumpara sa 19 ng Philadelphia para agawin ang panalo. Nagdagdag si John Collins ng 19 points at 11 rebounds para sa Hawks kasunod ang 16 at 15 markers nina Danilo Gallinari at Lou Williams, ayon sa pagkakasunod.
- Latest
