Cignal, F2 Logistics, BaliPure nag-eensayo na rin

MANILA, Philippines — Lumarga na rin ang training camp ng Cignal, F2 Logistics at BaliPure upang paghandaan ang Premier Volleyball League (PVL) Open Conference.

Nasa Splendido Country Club sa Laurel, Batangas ang HD Spikers kung saan tatakbo ang bubble training nito mula Hunyo 1 hanggang Hulyo 4.

Ito rin ang parehong venue na ginamit ng PLDT Home Fibr sa training camp nito noong Mayo 16 hanggang 30.

Kabilang sa mga nasa bubble ng HD Spikers sina Rachel Anne Daquis, Ranya Musa, Cherry Vivas, Janine Marciano at Ayel Estranero.

Napili naman ng Cargo Movers ang Valentino Resort and Spa sa San Jose, Batangas para pagdausan ng training camp mula Hunyo 7 hanggang Hulyo 7.

Wala si Kalei Mau na kasaluku-yang naglalaro sa Puerto Rico ngunit nakatakda itong bumalik sa Pilipinas sa oras na matapos na ang liga doon.

Dumayo naman sa Colegio de San Sebastian Pampanga Gym sa San Fernando, Pampanga ang Purest Water Defenders.

Tatakbo ang training camp ng BaliPure mula Hunyo 7 hanggang Hunyo 30.

Maliban sa PLDT, nakatapos na rin sa bubble training ang reigning Open Conference champion Creamline at Choco Mucho sa St. Paul American School sa Clark Freeport Zone.

Kasalukuyang sumasailalim sa training camp ang Perlas Spikers sa St. Vincent Gym sa Baguio City.