Jazz, 76ers, Hawks umusad

NEW YORK — Tinapos ng Utah Jazz, Philadelphia 76ers at Atlanta Hawks sa 4-1 ang kani-kanilang first-round playoffs series papasok sa semifinal round.

Sa Salt Lake City, kumamada si Donovan Mitchell ng 26 sa kanyang 30 points sa first half para banderahan ang Jazz sa 126-110 pagsibak sa Memphis Grizzlies sa Game Five ng kanilang Western Conference series.

Nagtala rin si Mitchell ng 10 assists at 6 rebounds sa loob ng 29 minuto para sa pagpasok ng Utah sa second round kung saan lalabanan nila ang mananaig sa serye ng Los Angeles Clippers at Dallas Mavericks.

Nagdagdag si Fil-Am at NBA Sixth Man of the Year Jordan Clarkson ng 24 points habang may 23 markers at 15 boards si Rudy Gobert kasunod ang 17 points ni Bojan Bogdanovic para sa ikaapat na sunod na panalo ng top-seeded Jazz.

Sa Philadelphia, umiskor si Seth Curry ng playoff career-high 30 points sa 129-112 pagpapatalsik ng 76ers sa Washington Wi-zards sa kanilang Eastern Conference series para labanan ang Hawks sa semis.

Nag-ambag si Tobias Harris ng 28 points at kumolekta si Ben Simmons ng triple-double sa kanyang 19 points, 11 assists at 10 rebounds para sa Philadelphia na naglaro na wala si Joel Embiid (knee injury).

Sa New York, humataw si Trae Young  ng 36 points at nagtala si Clint Capela ng 14 points at 15 rebounds sa 103-89 pagpulutan ng Hawks sa Knicks papasok sa semis.

Sa Los Angeles, nagtala si Luka Doncic ng 42 points, 14 assists at 8 boards sa 105-100 panalo ng Mavericks sa Clippers para sa kanilang 3-2 abante sa serye.