Nets umusad sa 2nd round

MANILA, Philippines — Hindi na nagpapigil ang Brooklyn Nets sa pagpasok sa semifinal round ng Eastern Conference matapos sibakin ang Boston Celtics, 123-109, sa Game Five ng kanilang first-round playoffs series.

Kumolekta si James Harden ng 34 points, 10 rebounds at 10 assists para sa una niyang postseason triple-double suot ang uniporme ng Brooklyn at tapusin ang kanilang best-of-seven duel sa 4-1.

Nagdagdag si Kyrie Irving ng 25 points kasunod ang 24 markers ni Kevin Durant para sa Nets na lalabanan ang Milwaukee Bucks sa Game One ng kanilang semis wars sa Linggo.

Tumapos ng 32 points si Jayson Tatum para sa Celtics na hindi nakaasa sa serbisyo nina injured guards Jaylen Brown at Kemba Walker.

Ang three-pointer ni Durant kasunod ang isa pang triple ni Irving ang nagbigay sa Brooklyn ng 103-89 abante sa 7:19 minuto ng fourth quarter na hindi na naputol ng Boston.

Sa Denver, nalampasan ng Nuggets ang mala-halimaw na laro ni Portland Trail Blazers guard Damian Lillard para kunin ang 147-140 double overtime win sa Game Five at itala ang 3-2 bentahe sa kanilang serye.

Puwede nang sibakin ng Denver ang Portland sa Game Six bukas papasok sa semis ng Western Conference.

Humakot si center Nikola Jokic ng 38 points, 11 rebounds at 9 assists para sa Nuggets at may 28 at 26 markers sina Monte Morris at Michael Porter Jr., ayon sa pagkakasunod.

Humataw si Lillard ng franchise playoff record na 55 points sa panig ng Blazers tampok ang playoff record na 12 triples.

Sa Phoenix, kumamada si Devin Booker ng 30 points para banderahan ang Suns sa 115-85 pagtunaw sa nagdedepensang Los Angeles Lakers sa Game Five at ilista ang 3-2 lead sa kanilang duwelo.

Pinamunuan ni Le-Bron James ang Lakers sa kanyang 24 points, 7 assists at 5 rebounds.