Nets nakauna sa Celtics
NEW YORK — Nagposte si Kevin Durant ng 32 points at may 29 markers si Kyrie Irving para banderahan ang Brooklyn Nets sa 104-93 pagpapatumba sa Boston Celtics sa Game One ng kanilang first-round playoffs series sa Eastern Conference.
Kumolekta si James Harden ng 21 points, 9 rebounds at 8 assists sa pang-siyam na sabay na paglalaro ng tinatawag na ‘Big Three’ ng Nets ngayong season.
Target ng Brooklyn na maitayo ang 2-0 bentahe sa kanilang serye ng Boston sa Game Two bukas.
Iniskor nina Durant, Irving at Harden ang 28 sa kabuuang 31 points ng Nets sa third period kung saan iniwanan nila ang Celtics sa 65-57 patungo sa pagtatala ng 13-point lead, 94-81, sa fourth quarter.
Nilimitahan ng Brooklyn si Boston star Jayson Tatum sa 22 points matapos humataw ng 50 markers sa panalo ng Celtics sa Washington Wizards para kunin ang No. 7 spot sa East playoffs.
Sa Milwaukee, isinalpak ni Khris Middleton ang isang jumper sa huling 0.5 segundo sa overtime para akayin ang Bucks sa 109-107 paglusot sa Miami Heat sa Game 1 ng kanilang sariling first round playoffs.
Sa Denver, kumamada si Damian Lillard ng 34 points para ihatid ang Portland Trail Blazers sa 123-109 paggulpi sa Nuggets at angkinin ang 1-0 lead sa kanilang serye sa Western Conference.
Sa Los Angeles, nagposte si Luka Doncic 31 points tampok ang limang triples para akayin ang Dallas Mavericks sa 113-102 pagpulutan sa Clippers.
- Latest
