Celtics pasok na sa playoffs

BOSTON — Nagpasabog si Jayson Tatum ng 50 points para banderahan ang Celtics sa 118-100 padomina sa Washington Wizards sa play-in tournament para angkinin ang No. 7 slot sa Eastern Conference playoffs.

Nagdagdag si Kemba Walker ng 29 markers at humakot si Tristan Thompson ng 12 points at 12 rebounds para sa Boston.

Lalabanan ni Tatum at ng Celtics ang No. 2 Brooklyn Nets sa first-round playoff series.

Tumapos si Bradley Beal na may 22 points sa panig ng Washington habang kumolekta si triple-double king Russell Westbrook ng 20 points, 14 boards, 5 assists, 3 steals at 2 blocks.

Makakatapat ng Wi-zards ang Indiana Pacers na sumibak ang Charlotte Hornets, 144-117, sa isa pang ‘do-or-die’ match para sa No. 8 slot at sa karapatang hamunin ang No. 1 Philadelphia 76ers sa first-round playoffs.

Tumipa si Oshae Brissett ng 23 points kasunod ang 21 markers ni Doug McDermott para sa pagpapatalsik ng Pacers sa Hornets.

Humakot si forward Domantas Sabonis ng 14 points, 21 rebounds at 9 assists para sa Indiana, ang No. 9 team matapos ang regular season.

Samantala, magtutuos ngayon sina LeBron James at Stephen Curry sa bakbakan ng nagdedepensang Lakers at karibal na Golden State Warriors sa bigating play-in tournament showdown sa West.

Magsasagupa ang No. 7 Lakers at ang No. 8 Warriors sa Staples Center kung saan ang mananalo ang haharap sa second-seeded Phoenix Suns sa first-round playoffs series.

Ang matatalo ang lalaban sa mananaig sa pagitan ng No. 9 Memphis Grizzlies at No. 10 San Antonio Spurs para sa pagkakataong sagupain ang top-seeded Utah Jazz sa first-round playoffs series.