Philippine karatekas sinalubong ng PSC
MANILA, Philippines — Simpleng salubong ang ibinigay ng Philippine Sports Commission (PSC) sa pagbabalik ng national karatedo team mula sa training camp sa Istanbul, Turkey kamakalawa ng gabi.
“Thank you PSC and the staff that arrange the welcome home salubong for our athletes,” sabi ni Karate Pilipinas president Richard Lim sa paglapag ng kanilang eroplano sa Ninoy Aquino International Airport (NAIA).
“We appreciate all the support and extra effort that you are doing for our Filipino athletes,” dagdag pa nito sa suporta ni PSC chairman William ‘Butch’ Ramirez.
Nanggaling ang mga national karatekas sa isang training camp sa Istanbul, Turkey simula noong Marso 15 bilang preparasyon sa qualifying tournament para sa 2021 Olympic Games sa Tokyo, Japan.
Babanderahan nina 2019 Southeast Asian Games gold medalists Junna Tsukii, kasalukuyang nagsasanay sa Serbia, at Jamie Lim ang kampanya ng national karatedo team sa World Olympic qualifier sa Hunyo 11 hanggang 13 sa Paris, France.
Naghahangad din ng Olympic berth ay sina 2019 SEA Games bronze winner Joanne Orbon, Sharief Afif, Ivan Agustin at Alvin Bactican.
- Latest
