Denver lumakas ang tsansa sa playoffs

LOS ANGELES — Nagsalansan si center Nikola Jokic ng 30 points at 14 rebounds at may 25 markers si Michael Porter Jr. sa 110-104 pagdaig ng Denver Nuggets sa LA Clippers.

Inagaw ng Nuggets (43-21) ang No. 3 spot sa Clippers (43-22) sa Western Conference para patatagin ang tsansa sa playoffs.

May 9-1 record ngayon ang Denver, kasama ang five-game winning streak sapul nang magkaroon si star guard Jamal Murray ng torn ACL sa kanyang kaliwang tuhod noong Abril 12.

Ang tatlong free throws ni Jokic kasunod ang triple ni Facundo Campazzo ang nagbigay sa Nuggets ng 107-98 abante sa huling 1:08 minuto ng fourth period na hindi na nahabol pa ng Clippers.

Binanderahan ni Paul George ang Los Angeles sa kanyang 20 points at may 18 at tig-16 markers sina Rajon Rondo, Kawhi Leonard at DeMarcus Cousins, ayon sa pagkakasunod.

Sa Salt Lake City, humataw si Bojan Bogdanovic ng 34 points habang may tig-15 markers sina Fil-Am Jordan Clarkson at Joe Ingles para igiya ang Utah Jazz (46-18) sa 106-102 paghuli sa Toronto Raptors (26-38).

Sa Cleveland, tumipa si Kendrick Nunn ng 22 points kasunod ang 20 markers ni Duncan Robinson sa 124-107 pagtunaw ng Miami Heat (34-30) sa Cavaliers (21-43).

Sa Dallas, kumolekta si Luka Doncic ng triple-double na 31 points, career-high 20 assist at 12 boards sa 125-124 pagtakas ng Mavericks (36-27) sa Washington Wizards (29-35).

Sa Houston, umiskor si Stephen Curry ng 30 points sa 113-87 pagpapabagsak ng Golden State Warriors (32-32) sa Rockets (16-46).