PVL 1-conference lang muna

MANILA, Philippines — Isang kumperensiya muna ang itataguyod ng Premier Volleyball League (PVL) sa taong ito.

Nais ng liga na ang Open Conference na lamang muna ang idaos para bigyan ng sapat na panahon ang national team na makapagsanay para sa 2021 Southeast Asian Games.

Hindi masisilayan sa taong ito ang Reinforced Conference na nagtatampok sa mga mahuhusay na foreign imports.

Ayon kay PVL president Ricky Palou, nais ng liga na makatulong sa paghahanda ng national team  para sa Vietnam SEA Games na gaganapin sa Nobyembre. “We feel that there will be one tournament this year basically because of the Southeast Asian Games being in November. We won’t have time for a second conference,” ani Palou.

Malaking balakid din sa pagdaraos ng Reinforced Conference ang travel restrictions dahil manggagaling sa ibang bansa ang imports na maglalaro rito.

Dalawang foreign imports ang maaaring hugutin ng bawat koponan.

Siniguro naman ni Palou na ibabalik ang Reinforced Conference sa susunod na taon kung maayos na ang lahat partikular na ang travel restrictions dito sa bansa.

Target na masimulan ang Open Conference sa Hunyo o Hulyo sa isang bubble setup.

Pinagpipilian ang Ins-pire Sports Academy sa Calamba, Laguna at ang iba pang pasilidad sa Subic.

“We are still figuring out the cost since we are now looking at either Inspire Sports Academy, Subic, or other areas. We are still comparing the cost of the venues,” ani Palou.

Kasama rin sa bubble ang national team para magkaroon ang tropa ng practice game laban sa mga PVL teams.

Maglalaro ang 12 teams sa isang single round-robin format kung saan tatlong laro kada-araw sa torneong idaraos sa loob lamang ng pito hanggang walong linggo para mas makatipid ang liga sa gastusin.

“We are having three games a day just to cut the tournament a little bit shorter,” ani Palou..