Ando, Sarno may pag-asa sa Tokyo Olympics
MANILA, Philippines — Bukod kay Hidilyn Diaz, umaasa rin ang Samahang Weightlifting ng Pilipinas (SWP) na makakakuha ng tiket sina national lifters Elreen Ando at Vanessa Sarno para sa 2021 Olympic Games sa Tokyo, Japan.
Sa Philippine Sportswriters Association (PSA) Forum online edition kahapon ay sinabi ni SWP president Monico Puentevella na magsasagawa ang International Weightlifting Federation (IWF) ng evaluation kung sino ang mga mabibigyan ng Olympic berth.
“After the other continental qualifying events are finished this week they (IWF) will make an evalua-tion,” wika ni Puentevella. “Ang feeling ko baka makatsamba rin itong da-lawa (Ando at Sarno) kasi maganda rin ang showing nila sa World Championships sa Rome, maganda rin dito (Asian Weightlifting Championships).”
Sa Asian tournament sa Tashkent, Uzbekistan ay bumuhat ang 17-anyos na si Sarno ng dalawang gold medals sa women’s 71kg division. May dalawang pilak at isang tansong medalya naman ang 22-anyos na si Ando sa women’s 64kg category.
“I’m hoping and praying na makakuha ng gold, makakuha pa ng dalawang dagdag. But I have to be honest, we have to finish everybody first sa Africa, sa Europe,” ani Puentevella. “Palagay ko ‘pag nasuma baka isa o dalawa ang makapasok.”
Sa kampanya ng Team Philippines sa Asian meet na nagsilbi ring Olympic qualifying ay kumolekta ang mga national lifters ng kabuuang dalawang gold, anim na silver at tatlong bronze medals.
- Latest
