Higit 20 Pinoy sa Tokyo Olympics?

MANILA, Philippines — Posible pang lumagpas sa 20 ang bilang ng mga Pinoy athletes na maaaring kumampanya sa 2021 Olympic Games sa Tokyo, Japan sa Hulyo.

Ang pinagbasehan ni Philippine Sports Commission (PSC) chairman William ‘Butch’ Ramirez ay ang kasalukuyang pag-lahok ng mga atleta sa mga Olympic qualifying tournaments sa iba’t ibang bansa.

“Meron tayong almost 100 athletes who were sent to foreign training and to (Olympic) qualifying and at the moment meron tayong pitong qualified tapos meron pa tayong 20 who are fighting it out,” wika kahapon ni Ramirez.

Ang tinutukoy na pitong Olympic qualifiers ng PSC chief ay sina 2016 Rio de Janeiro Olympics silver medalist Hidilyn Diaz, pole vaulter Ernest John Obiena, gymnast Carlos Edriel Yulo at boxers Eumir Felix Marcial, Irish Magno, Nesthy Petecio at Carlo Paalam.

“Kung magkakaroon tayo ng 20-plus, meron pang mga wildcard and universality. I think it will be a big delegation,” ani Ramirez.

Noong 2016 Olympics sa Rio de Janeiro, Brazil ay 13 atleta ang kumatawan sa Team Philippines.

Ilan sa mga nagha-hangad ng Olympic ticket ay sina 2018 Asian Games gold medal winner Margielyn Didal (skateboarding), 2019 Southeast Asian Games winner Kiyomi Watanabe (judo), Junna Tsukii (karatedo), Kristina Knott at Eric Cray (athletics) at Yuka Saso at Bianca Pagdanganan (golf).

Wala pang Pinoy athlete na nagwagi ng gold medal sa Olympics sapul nang sumali ang Pilipinas sa quadrennial event noong 1924 sa Paris, France.

“Mahirap mag-predict and we will leave it to the NSA (National Sports Association) and to the POC (Philippine Olympic Committee) kasi kanila naman talaga iyan, kami suporta lang,” dagdag ni Ramirez na nagsabi ring handang sumuporta ang PSC sa preparasyon at kampanya ng mga atleta. “We’re ready and we have the budget”.