May katapat ang magandang performance ng weightlifters

MANILA, Philippines — Nabigo si John Dexter Tabique na makahirit ng medalya sa men’s 96-kilogram class sa pagtatapos ng kampanya ng Team Philippines sa Asian Weightlifting Championships sa Tashkent, Uzbekistan.

Sa kabuuan ay kumolekta ang mga national lifters ng dalawang gold, anim na silver at tatlong bronze medals sa nasabing torneo na nagsilbi ring qualifying tournament para sa 2021 Olympic Games sa Tokyo, Japan.

Sa nasabing torneo ay pormal na inangkin ni 2016 Rio de Janeiro Olympic Games silver medalist Hidilyn Diaz ang tiket para sa quadrennial event.

Tumapos sa ikaapat na puwesto ang 30-anyos na si Diaz, sasabak sa kanyang ikaapat na sunod na Oympics stint, sa women’s 55kg category.

Ang dalawang gintong medalya ng Team Philippines sa Asian meet ay mula kay weightlifting prodigy Vanessa Sarno bukod sa isang pilak sa women’s 71kg, habang may tatlong pilak si Mary Flor Diaz sa women’s 45kg class.

Dalawang silver at isang bronze medal ang nakuha ni Elreen Ando sa women’s 64kg category at nagdagdag ng dalawang bronze si Kristel Macrohon sa women’s 76kg division.

Kagaya nina Hidilyn Diaz at Tabique, wala ring nakolektang medalya sa kani-kanilang mga weight classes sina Eileen Perez (women’s 49kg), John Fabuar Ceniza (men’s 61kg) at Margaret Colonia (women’s 59kg).

Bilang pagpapahalaga sa mga medalyang nakuha nina Sarno, Mary Flor Diaz, Ando at Macrohon ay bibigyan sila ng Philippine Sports Commission (PSC) ng cash incentive base sa Republic Act 10699 o ang Expanded Athletes Incentives Acts.