Nabawi ng E-Gilas ang titulo

MANILA, Philippines — Matagumpay na naibalik ng E-Gilas Pilipinas ang titulo sa kanilang teritoryo matapos pagharian ang FIBA Esports Open III Southeast Asia Conference kahapon.

Inilabas ng Pinoy gamers ang buong tikas nito para pulbusin ang Indonesia sa 2-0 sa best-of-three championship showdown.

Naitarak ng E-Gilas ang gitgitang 60-53 panalo sa Game 1 na agad nitong sinundan ng 44-36 pananaig sa Game 2 para makumpleto ang matamis na sweep sa finals.

Makulay na tinapos ng E-Gilas Pilipinas ang kampanya nito tangan ang malinis na rekord. Na-sweep din ng Pinoy squad ang group stage matapos igupo ang Vietnam (78-40) at Maldives (124-30) bago payukurin ang Mongolia sa pamamagitan ng 2-0 demolisyon sa best-of-three semifinals.

Nakapasok naman sa finals ang Indonesia nang gapiin nito ang Vietnam, 2-0 sa hiwalay na semis series.

Ito ang ikalawang korona ng Pilipinas sa torneo matapos pagharian ang unang edisyon ng FIBA Esports Open Southeast Asia Conference noong Hunyo nang talunin rin nito ang Indonesia sa finals.

Nagkasya lamang sa runner-up ang E-Gilas sa FIBA Esports Open II Southeast Asia/Oceania Conference noong Nobyembre nang matalo sa Australia.

Bahagi ng E-Gilas squad sina Arnie Sison, Clark Banzon, Custer Galas, Ian Santiago, Philippe Herrero, Rial Polog Jr.  at ang Most Valuable Player ng torneo na si Aljon “Shintarou” Cruzin.