Nuggets tinalo ang 76ers sa harap ng live audience

DENVER — Naghulog si guard Jamal Murray ng 30 points at may 27 markers si Michael Porter Jr. para banderahan ang Nuggets sa 104-95 pagpapatumba sa Philadelphia 76ers.

Kumolekta si center Nikola Jokic ng 21 points para sa Denver (29-18) na naglaro sa harap ng kanilang home crowd sa kauna-unahang pagkakataon matapos mahinto ang 2019-20 season noong Marso ng 2020 dahil sa pandemya.

“We missed that energy from the crowd. It’s just good to have fans back in the building. We were having to create our own energy,” ani Porter.

Pinamunuan ni reserve Tyrese Maxey ang Philadelphia (32-15) sa kanyang 13 points.

Sa Washington, umiskor si Terry Rozier ng 27 points habang may 26 markers at season-high 11 rebounds si Gordon Hayward para akayin ang Charlotte Hornets (24-22) sa 114-104 tagumpay sa Wizards (17-29).

Naglaro ang Wa-shington na wala si NBA leading scorer Bradley Beal (bruised right hip) at nakakuha kay Rui Hachimura ng career high 30 points.

Ipinoste naman ni Russell Westbrook ang kanyang ika-17 triple-double para sa Wizards ngayong season sa tinapos na 22 points, 15 assists at 15 rebounds.