Hidilyn Diaz negative sa COVID-19

MANILA, Philippines — Para makatiyak na ligtas siya sa coronavirus disease (COVID-19) ay sumailalim si 2016 Olympic Games silver medalist Hidilyn Diaz sa isang swab test.

Sa kanyang Instagram post ay ipinakita ng national lady weightlifter ang pagsailalim niya sa nasabing proseso.

“First time to do covid-19 swab test,” ang caption ng 2019 Southeast Asian Games gold medal winner na kasalukuyang nasa kanyang training camp sa Malacca, Malaysia.

Kaagad nakuha ni Diaz ang negative results ng kanyang swab test.

Nakatakdang sumabak ang 30-anyos na si Diaz sa Asian Weightlifting Championships sa Uzbekistan sa Abril 16 hanggang 25 na tumatayong qualifying tournament para sa 2021 Olympics na idaraos sa Tokyo, Japan sa Hulyo 23 hanggang Agosto 8.

Ito ang ikaanim na lalahukang qualifying meet ng tubong Zamboanga City na opisyal na magbibigay sa kanya ng Olympic berth para makasama sina pole vaulter Ernest John Obiena, gymnast Carlos Edriel Yulo at boxers Eumir Felix Marcial, Irish Magno, Nesthy Patecio at Carlo Paalam.

Hangad ni Diaz ang kanyang ikaapat na Olympics appearance matapos noong 2008 (Beijing), 2012 (London) at 2016 (Rio de Janeiro, Brazil).