Harden, Harris nagbida sa panalo ng Nets

INDIANAPOLIS — Tumapos si James Harden na may triple-double habang nagdagdag si Joe Harris ng 19 points para banderahan ang Brooklyn Nets sa 124-115 pagligpit sa Indiana Pacers.

Kumolekta si Harden ng 40 points, 15 assists at 10 rebounds para sa kanyang ika-11 triple-double sa season sa pag-akay sa Nets (28-13) na hindi nakuha ang serbisyo nina All-Stars Kyrie Irving (groin) at Kevin Durant (hamstring) at Blake Griffin (knee).

Pinamunuan ni Malcolm Brogdon ang Pacers (17-22) sa kanyang 24 points at nagposte si Domantas Sabonis ng triple-double na 18 points, 11 boards at 11 assists.

Sa Philadelphia, humataw si Giannis Antetokounmpo ng 10 sa kanyang 32 points sa overtime para igiya ang Milwaukee (26-14) sa 109-10 paglusot sa 76ers (28-13).

Sa Houston, tumipa si Draymond Green ng 16 points, 12 rebounds at 10 assists sa 108-94 panalo ng Golden State Warriors (21-20) sa Rockets (11-28) na nalasap ang franchise-record na ika-18 sunod na kamalasan.

Sa iba pang balita, idinagdag ng Bucks si veteran forward PJ Tucker sa kanilang puwersa matapos dalhin sina DJ Augustin at DJ Wilson sa Houston Rockets.

Bukod sa 35-anyos na si Tucker ay nakuha rin ng Milwaukee si Rodions Kurucs mula sa Houston.

Ibinigay ng Heat si forward Leonard Meyers Leonard at isang second-round pick sa 2027 draft sa Oklahoma City Thunder para makuha si veteran guard Trevor Ariza.

Hindi pa nakikita si Ariza sa anumang NBA game sapul noong Marso 10, 2020.

Target din ng Miami na makuha si center LaMarcus Aldridge mula sa San Antonio Spurs habang walang plano ang Thunder na isama sa kanilang line-up si Leonard na posible nilang i-trade o bitawan ang kanyang $10.2 million option para sa susunod na season.