Ang pagbabalik ng volleyball
MANILA, Philippines — Simula na ang mainit na bakbakan tampok ang matitikas na beach volleybelles sa bansa sa pagsambulat ngayong araw ng 2021 Gatorade-Beach Volleyball Challenge Cup sa Subic Bay Metropolitan Authority (SBMA) sand courts.
Walong koponan ang magsasalpukan para sa korona kung saan hahatiin ito sa dalawang grupo — Pool A at Pool B.
Nasa Pool A sina Jenny Mar Senares at Kyla Angela Gallego ng F2 Logistics, Ariane Luna Alarcon at Christina Canares ng PetroGazz, Bang Pineda at Jonah Sabete ng Sta. Lucia-2 at sina Alexa Polidario at Erjan Magdato ng Abanse Neg-rense-1.
Pasok naman sa Pool B sina DM Demontano at Jackie Estoquia ng Sta. Lucia-1, Ella Viray at Theresa Ramas ng United Auctioneers, Jennifer Cosas at Gelimae Villanueva ng Abanse Negrense-2 at sina Jonah San Pedro at Javen Sabas ng Toby’s Sports.
Maglalaro ang bawat koponan ng round robin sa kani-kanyang pool para madetermina ang ranking sa crossover quarterfinals.
Unang masisilayan ang hatawan ng F2 Logistics at PetroGazz sa alas-8 ng umaga kasunod ang duwelo ng United Auctioneers at Abanse Negrense-2 sa alas-9.
Muling sasalang ang F2 Logistics kontra naman sa Abanse Negrense-1 sa alas-10 at ang United Auctioneers at Toby’s Sports sa alas-11.
Sa aftenoon session, papalo ang salpukan ng Sta. Lucia-2 at Abanse Negrense-1 sa alas-2 kasunod ang laro ng Sta. Lucia-1 at Toby’s Sports sa alas-3, Sta. Lucia-2 at PetroGazz sa alas-4, at Sta. Lucia-1 at Abanse Negrense-2 sa alas-5.
Magpapatuloy ang classification round bukas ng umaga habang lalaruin naman ang quarterfinals simula alaas 2 ng hapon. Sa linggo ang semifinals at finals.
- Latest