All Stars

Kahit walang kasiguruhan kung maidaraos ang All-Star Game dahil sa pandemya, tuloy ang NBA tradition na magpaboto ng NBA All Stars.

At dahil dito, lalong lalawig at lalalim ang credentials ng mga superstars gaya ni LeBron James bilang All-Star players.

Sabi ng NBA: “Naming NBA All-Stars is an annual tradition that honors an exclusive group of players for extraordinary performances during the season. We look forward to recognizing the best of the best this season.”

May sariling magagandang konsepto ang PBA, pero hindi maitatanggi na marami silang ginaya sa NBA. At tingin ko eh hindi masamang pulutin din ng local pro league ang bagay na ito.

Kung naisip nila ito last season, sana eh may nakatanggap ng karangalang matawag na Season 45 All Stars o Clark Bubble All Stars. Maaaring natablahan na ni James Yap ang record ni Asi Taulava bilang 16-time All-Star.

Nakalatag sana na gawin ang Season 45 All Stars sa Passi, Ilo-ilo pero dahil sa lockdown, nawalis ang All Stars kasama ng Governors Cup, Commissioner’s Cup at marami pang ibang activities sa mahaba sanang selebrasyon ng PBA sa isang milestone season.

Wala naman duda na naging kapuri-puri pa rin ang PBA na makagawa ng effort na ma-entertain ang Pinoy basketball fans sa pamamagitan ng Clark bubble play.