Kai Sotto todo kayod sa training

MANILA, Philippines — Todo kayod si Kai Sotto sa ensayo upang maabot ang inaasam na pangarap — ang maging kauna-unahang purong Pinoy basketball player sa NBA.

Desidido ang 7-foot-3 na mabigyan ng magandang impresiyon ang mga NBA coaches kaya’t nagsisikap ito sa ensayo ng Ignite Team sa Walnut Creek, California.

Walang ibang hangarin si Sotto kundi ang makakuha ng puwesto sa susunod na edisyon ng NBA rookie draft.

“My goal is to be the best player that I can be. I’m trying my best to get drafted next year,” ani Sotto na nais bigyan ng kasiyahan ang mga kababayan nito na todo suporta sa kanyang NBA dream. “When I make it to the NBA, I hope I make everybody proud.”

Masuwerte ang dating UAAP Juniors MVP dahil napapalibutan ito ng mga beteranong NBA players at coaches na gumagabay sa kanya sa training camp. Hawak ito ni Ignite head coach Brian Shaw na malalim ang karanasan sa NBA.

Kasama ni Sotto sa Ignite team ang ilang dating NBA players kabilang na si Jarret Jack na nakapaglaro sa Cleveland Cavaliers, Brooklyn Nets, New York Knicks, Portland Trail Blazers, Indiana Pa-cers, Toronto Raptors, New Orleans Hornets at Golden State Warriors.

Masusubukan ang tikas ni Sotto sa pagsisimula ng NBA G League season sa susunod na buwan sa isang bubble setup sa ESPN Wide World of Sports Complex sa Orlando, Florida.