Lakers lusot sa Grizzlies

MEMPHIS, Tenn. — Humataw sina Anthony Davis at LeBron James ng tig-26 points para ihatid ang nagdedepensang Los Angeles Lakers sa 94-92 pag-eskapo sa Grizzlies.

Nagtala rin si James ng 11 rebounds at 7 assists habang may 12 markers si Dennis Schro-der para sa ikaapat na sunod na ratsada ng Los Angeles (6-2) na na­ngunguna na ngayuon sa Pacific Division.

“That’s why he’s great,” ani Lakers coach Frank Vogel kay James. “He finds a way to make those superhero-type of plays. Our focus is on making sure we don’t need those superhero-type of plays to close games out.”

Umiskor sina Jonas Valanciunas, Dillon Brooks at Gorgui Dieng ng tig-13 points para pamunuan ang Memphis (2-5), nakahugot kay Brandon Clarke ng 12 markers.

Matapos kunin ng Grizzlies ang 79-77 abante sa huling limang minuto ng fourth period ay nagsanib sina James at Davis sa 9-2 atake para ibigay sa Lakers ang 86-81 bentahe patungo sa 92-83 paglayo sa natitirang 31.1 segundo.

Sa New York, humugot si guard  Kyrie Irving ng 20 sa kanyang 29 points sa first half para tulungan ang Brooklyn Nets sa 130-96 panalo sa Utah Jazz.

Tumipa si Caris LeVert ng 24 points at nagtumpok si Jarrett Allen ng 19 points at 18 rebounds para sa Nets (4-4) na nakakuha kay Joe Harris ng 10 points.

Sa Denver, humakot si center Nikola Jokic ng 35 points, 15 boards at 6 assists para pamunuan ang Nuggets (3-4) sa 123-116 tagumpay laban sa Minnesota Timberwolves (2-5).

Umiskor si Jokic ng 13 markers sa fourth quarter habang nagdagdag sina Will Barton at reserve JaMychal Green ng 20 at 17 points, ayon sa pagkakasunod.

Sa Los Angeles, itinakas ng San Antonio Spurs (3-4) ang 116-113 panalo kontra sa Clippers (5-3) tampok ang 21 points ni Dejounte Murray.