Bakuna muna bago mag-training

MANILA, Philippines — Bago ipasok ang mga Olympic Games qualifiers at hopefuls sa isang ‘bubble’ training ay kailangan muna silang maturukan ng bakuna para sa coronavirus disease (COVID-19).

At umaasa si Philippine Sports Commission (PSC) chairman William “Butch” Ramirez na sa Enero ay mababakunahan na ang mga national athletes.

Sinabi ni Ramirez na makikiusap siya sa Department of Health (DOH) na maisama rin ang mga Olympic qualifiers at aspirants sa mga unang mabibigyan ng bakuna para sa COVID-19.

“Ang Philippine Sports Commission ay parte ng DOH, GAB (Games and Amusements Board) at saka CHED (Commission on Higher Education) sa sports,” wika ni Ramirez sa programang “PSC Hour”. “We will communicate with the DOH to give priority to sports who will be competing for 2021.”

Sina pole vaulter Ernest John Obiena, gymnast Carlos Edriel Yulo at boxers Eumir Felix Marcial at Irish Magno pa lamang ang may tiket para sa 2021 Olympics na gagawin sa Tokyo, Japan.

Nagsasanay sina Obiena, Yulo at Marcial sa Italy, Japan at United States, ayon sa pagkakasunod, habang nasa Iloilo City si Magno. Plano ng PSC na ipasok ang mga national boxers, taekwondo jins at karatekas sa isang ‘bubbe’ training sa Inspire Sports Academy sa Calamba, Laguna.

Kamakailan ay binigyan ng Inter-Agency Task Force (IATF) ng ‘go signal’ ang pagbabalik-ensayo ng mga atleta sa loob ng isang ‘bubble’.

Bukod sa 2021 Tokyo Olympics ay paghahandaan din ng mga national athletes ang 31st Southeast Asian Games sa Vietnam sa Nobyembre at Asian Games sa 2022 sa China.