Petecio humingi ng tulong sa PSC

MANILA, Philippines — May isang request si national boxer Nesthy Petecio sa Philippine Sports Commission (PSC) na inaasahang tutugunan naman ni chairman William ‘Butch’ Ramirez.

Hiniling ni Petecio, isa sa mga Pinoy athletes na naghahangad ng tiket sa 2021 Olympic Games sa Tokyo, Japan na sagutin ng PSC ang kanyang renta sa apartment at bayad sa boxing gym sa Digos City, Davao del Sur.

“Iyong apartment ko po 4k po monthly, hindi kasama iyong tubig at kuryente. Sa gym naman po nag-apply ako ng one year na membership tapos for one month na bayad, bale P2,200 po nabayaran ko,” ani Petecio.

Matapos makauwi sa Santa Cruz, Davao del Sur nang maipit sa PhilSports Arena sa Pasig City dahil sa coronavirus disease (COVID-19) pandemic ay nagdesisyon ang 28-anyos na magtungo sa Digos City at umupa ng apartment at magsanay sa isang boxing gym para sa kanyang paghahanda sa Olympic qualfiying tournament sa Mayo ng susunod na taon.

Umaasa si Petecio, ang gold medalist noong 2019 AIBA Women’s World Boxing Championships, na diringgin ng PSC ang kanyang request sa mga gastusin niya sa preparasyon.

“Sabi naman po ni (PSC) Comm. Charles Maxey, sasagutin daw ng PSC at pag-uusapan po nila sa Board,” wika ni Petecio, sumuntok ng gintong medalya noong 2019 Southeast Asian Games.

Hangad ni Petecio na maging ikatlong boxer na maglalaro sa 2021 Tokyo Olympics kasama sina middleweight Eumir Felix Marcial at flyweight Irish Magno.

Nauna nang nabigo si Petecio na makasikwat ng Olympic berth nang matalo sa kanyang feather-weight match kay Japanese Sena Irie sa Asia and Oceania Boxing Olympic Qualification Tournament sa Amman, Jordan.

Nag-qualify na rin sa Olympics ay sina pole vaulter Ernest John Obie-na at gymnast Carlos Ed-riel Yulo.