Tinapos ng Lakers para kay Bryant

LAKE BUENA VISTA, Florida — Ngayon ay may kasosyo na ang Boston Celtics sa listahan ng paramihan ng NBA title.

Tuluyan nang tinapos ng Los Angeles Lakers ang kanilang champion-ship series ng Miami Heat, 106-93 sa Game Six ng 2020 NBA Finals para sa kanilang ika-17 korona katabla ang Celtics.

Isinara ng Lakers ang kanilang best-of-seven duel ng Heat sa 4-2.

Kumolekta si LeBron James ng triple-double para pamunuan ang Los Angeles sa tinapos niyang 28 points, 14 rebounds at 10 assists at angkinin ang kanyang ikaapat na Finals MVP award at pang-apat na NBA ring.

“I put myself, my body and my mind in position to be available to my teammates,” wika ni James. “I’ve never missed a playoff game in my career, and the best thing you can do for your teammates is be available. And for me to be available to my teammates and put in the work, I just hope I make my guys proud, and that’s all that matters to me.”

Nagdagdag naman si Anthony Davis ng 19 points at 15 boards sa pagsibak sa Miami.

Inalay ng Lakers ang kanilang tagumpay kay Kobe Bryant.

“He was a big brother to all of us. We did this for him,” ani Davis ukol kay Bryant na nasawi noong Enero kasama ang kanyang anak na si Gianna sa isang helecopter crash.

 “We have a Ph.D. in adversity, I can tell you that much,” sabi naman  ni Lakers’ head coach Frank Vogel. “We’ve been through a lot, but I’m so damn proud of this team. World champions!”

Huling naitaas ng Los Angeles ang Larry O’Brien Trophy noong 2010 matapos talunin ang Boston kung saan hinirang ang namayapang si Kobe Bryant bilang Finals MVP.

“Go Lakers! Congratulations Uncle P! Congratulations @lakers. Kobe was right, RP! “Stay the course - blockout the noise.” Wish Kobe and Gigi were here to see this,” sabi ni Va-nessa Bryant sa kanyang Instagram story.

Nalimitahan naman si Jimmy Butler sa 12 points sa panig ng Heat matapos humataw ng ikalawa niyang triple-double sa NBA Finals sa panalo nila sa Game Five.

Binanderahan ni center Bam Adebayo ang Miami, umiskor lamang ng 16 points sa kabuuan ng second period.