Malakas pa rin ang SMBeer-- Guiao

MANILA, Philippines — Hindi naniniwala si NLEX Road Warriors coach Yeng Guiao na hihina ang San Miguel ni mentor Leo Austria dahil hindi maglalaro si June Mar Fajardo sa 2020 PBA Philippine Cup.

Marami ang nagsasabing magiging patas na ang kompetisyon sa torneo dahil sa pagkawala ng six-time PBA Most Valuable Player sa ‘bubble’ sa Clark Freeport Zone sa Angeles, Pampanga.

 “They’re saying June Mar is not playing and maybe San Miguel is vulnerable. But the way they played their first game, they didn’t look as such,” wika ni Guiao sa The Link podcast.

Sa kabila ng hindi paglalaro ng 6-foot-10 na si Fajardo ay tinalo pa rin ng San Miguel ang Magnolia, 94-78 sa pagbubukas ng 2020 PBA Philippine Cup noong Marso 8 bago natigil dahil sa coronavirus disease (COVID-19) pandemic.

Bukod kay Fajardo, kinukumpleto ang kanyang theraphy at recovery mula sa shin injury, hindi rin kasama ng Beermen sa PBA ‘bubble’ sina big guard Matt Ganuelas-Rosser at Chico Lanete.

Muling sasandigan ni Austria sina 6’8 Fil-Tongan Moala Tautuaa, Terrence Romeo, Arwind Santos, Marcio Lassiter, Alex Cabagnot at Chris Ross sa kanilang kampanya sa torneong magsisimula sa Linggo sa Angeles University Foundation Gym.

Bubuksan ang salpukan ng TNT Katropa at Alaska ang PBA restart sa alas-4 ng hapon kasunod ang bakbakan ng Barangay Ginebra at NLEX sa alas-6:45 ng gabi.

Kabuuang 66 games ang gagawin sa eliminations tampok ang isang triple header sa Oktubre 31 sa banggaan ng Blackwater at Terrafirma, tapatan ng Meralco at TNT Katropa at sultada ng Rain or Shine at Phoenix.