Pa-US na si Ancajas para sigurado
MANILA, Philippines — Mabuti nang nakapasok na si Filipino world super flyweight champion Jerwin Ancajas sa United States kaysa maghintay pa siya sa Pilipinas.
Nakakuha na si Ancajas, ang kasalukuyang International Boxing Federation (IBF) super flyweight king, ng US visa at naka-schedule na bumiyahe patungong California kahapon.
Nakatakdang idepensa ng 28-anyos na si Ancajas (32-1-1, 22 KOs) ang kanyang bitbit na IBF crown laban kay Mexican challenger Jonathan Javier Rodriguez (21-1-0, 15 KOs).
Ayon kay Sean Gibbons, ang pangulo ng MP Promotions ni world eight-division champion Manny Pacquiao, may opsyon si Ancajas sakaling hindi matuloy ang laban nito kay Rodriguez.
Puwedeng labanan ng tubong Panabo City, Davao del Norte si World Boxing Association (WBA) super flyweight titlist Joshua Franco (17-1-2, 8 KOs) ng US.
“We have a mandatory still with the IBF with Jonathan Javier Rodriguez that’s there, but if something happens, a unification would come up with the WBA champion Joshua Franco, that’s on the table also,” ani Gibbons.
Huling lumaban si Ancajas noong Disyembre kung saan umiskor siya ng isang sixth-round TKO win kontra kay challenger Miguel Gonzalez ng Chile.
Kasama ni Ancajas na magtutungo sa US si Tok-yo Olympics-bound Eumir Felix Marcial, lalaban rin bilang professional boxer sa bakuran ng MP Promotions.
“He’s just coming over here to train and prepare and hopefully we can get him a fight by the end of the year,” wika ni Gibbons.
- Latest
