Uwing-uwi na si Casimero

MANILA, Philippines — Halos siyam na buwan nang nasa United States si Filipino world bantamweight champion John Riel Casimero para sa ensayo at laban.

Kaya naman kating-kati na ang World Boxing Organization (WBO) bantamweight king na makauwi sa kanyang pamilya sa Ormoc City, Leyte sa unang linggo ng Oktubre.

“Uuwi muna ako kasi nami-miss ko na iyong family ko. Magna-nine months na ako dito at itong Las Vegas (Nevada) parang kulungan ko na,” sabi kahapon ni Casimero mula sa US sa webcast edition ng Philippine Sportswriters Association (PSA).

Sa kanyang pagpunta sa Las Vegas para sana sa kanilang unification fight ni Japanese star Naoya Inoue ay parang nakulong si Casimero.

“Lalabas lang kami kapag mag-eensayo tapos balik sa bahay. Focus talaga kami dito parang nasa training camp. Walang gala-gala, nakakatulong talaga dito kasi nakaka-focus ka sa ensayo,” ani Casimero.

Galing si Casimero  (30-4-0, 21 KOs) sa ma-tagumpay na title defense matapos talunin si Ghanian challenger Duke Micah (24-1-0, 19 KOs) via third-round TKO win noong Linggo sa Mohegan Sun Arena sa Uncasville, Connecticut.

Gusto ni Casimero na isunod si Inoue (19-0-0, 16 KOs) na may suot ng International Boxing Federation (IBF) at World Boxing Association (WBA) bantamweight belts.

“Kung ayaw talaga ni Naoya Inoue na lumaban sa akin aakyat ako sa super bantamweight para labanan si Luis Nery,” ani Casimero kay Nery (31-0-0, 24 KOs) na bitbit ang World Boxing Council (WBC) super bantamweight crown.

Itataya ni Inoue (19-0-0, 16 KOs) ang kanyang mga bitbit na IBF at WBA belts laban kay Australian challenger Jason Moloney (21-1-0, 18 KOs) sa Oktubre 31 sa MGM Grand Conference Center sa Las Vegas.