Heat vs Lakers sa finals
LAKE BUENA VISTA, Florida — Eksaktong isang taon nang pumasok si Jimmy Butler sa Miami Heat practice gym, kumuha ng silya at umupo sa ginawang stage at sinabing gusto niyang maging bahagi ng susunod na title run ng koponan.
At mayroon na siyang tsansa para magawa ito.
Humakot si big man Bam Adebayo ng season-high na 32 points at kumolekta ng 14 rebounds habang may 22 markers si Butler para akayin ang Heat sa 125-113 pagsibak sa Boston Celtics sa Game Six at angkinin ang Eastern Conference title papasok sa NBA Finals.
“This group, more than anything, they just love to compete,” sabi ni Miami Fil-Am head coach Erik Spoelstra sa trophy celebration.
Itiniklop ng Heat ang kanilang serye ng Celtics sa 4-2 para labanan si LeBron James at ang LA Lakers sa best-of-seven Finals sa NBA bubble.
Nakatakda ang Game One sa Sept. 30. (Huwebes, Manila time).
Nagdagdag si Tyler Herro ng 19 points habang may tig-15 sina Duncan Robinson at Andre Iguodala, ayon sa pagkakasunod habang may 13 markers si Goran Dragic, para sa Miami.
Binanderahan naman ni Jaylen Brown ang Boston sa kanyang 26 points at nagtala si Jayson Tatum ng 24 markers at career-high 11 assists.
Sina Marcus Smart at Kemba Walker ay umiskor ng tig-20 points para sa Celtics na natalo sa East finals sa ikatlong pagkakataon sa huling apat na seasons.
Ang magkasunod na tirada ni Herro ay bahagi ng 9-0 atake ng Heat para kunin ang 10-point lead sa fourth quarter na lumobo pa sa 116-102 na hindi na natibag ng Celtics.
- Latest
