Training ng mga Olympic hopefuls isinusulong sa IATF

MANILA, Philippines — Kinukumpleto na ng Philippine Olympic Committee (POC) ang mga papeles para hilingin sa Inter-Agency Task Force (IATF) na payagan na ang mga Olympic Games hopefuls na makabalik sa ensayo sa gitna ng coronavirus disease (COVID-19) pandemic na nagpahinto sa aktibidad ng mga national athletes.

Sinabi kahapon ni POC president Abraham ‘Bambol’ Tolentino, ang kinatawan ng ika-8 distrito ng Cavite na ang kanilang request sa IATF ay para lamang sa 19 National Sports Associations (NSAs) na may mga atletang tumatarget ng tiket sa 2021 Olympics sa Tok-yo, Japan.

“We will be requesting the approval of the resumption of the training of those 19 NSAs sa IATF to allow them to start their training kahit saan sila nandoon,” ani Tolentino sa Philippine Sportswriters Association (PSA) online Forum.

Natengga ang training ng mga national athletes nang pumutok ang COVID-19 noong Marso at hanggang ngayon ay ipinagbabawal pa rin ng IATF ang pagte-training ng mga ito.

Kabilang sa mga Olympic hopefuls ay sina 2016 Rio de Janeiro silver medalist Hidilyn Diaz (weightlifting), 2018 Asian Games gold medal winner Margielyn Didal (skateboarding) at Fil-Am tracksters Kristina Knott at Eric Shaun Cray.

“Kapag nag-MGCQ (Modified General Community Quarantine) na, baka tuluy-tuloy na ‘yung resumption ng training. Unless we can give a beter venue for that. Health and safety pa rin ang pinag-uusapan,” sabi ng POC chief.

Samantala, tiniyak ni Tolentino na target niya ang kanyang ikalawang termino bilang pangulo ng POC sa eleksyon na nakatakda sa Nobyembre 27.

“Definitely I will run for (POC) president dahil hindi naman full term ‘yung tinakbuhan ko eh,” ani Tolentino.