Heat lumapit sa East Finals
LAKE BUENA VISTA, Florida — Isang panalo na lamang ang kailangan ni Jimmy Butler at ng Miami Heat papasok sa Eastern Conference Finals.
Humataw si Butler ng 30 points at nagdomina ang Heat sa fourth quarter para patumbahin ang Milwaukee Bucks, 115-100, sa Game Three ng kanilang best-of-seven semifinals series sa NBA playoffs
Umiskor ang Miami ng 40 points sa kabuuan ng fourth period para ilista ang 3-0 bentahe sa kanilang semis showdown ng East top seed Milwaukee. Sa NBA playoff history ay wala pang koponang nakakabangon mula sa 0-3 pagkakabaon sa isang serye.
Humakot si Bam Adebayo ng 20 points at 16 rebounds para sa Heat at may 17 markers si Jae Crowder.
Umiskor naman si big man Brook Lopez ng 22 points sa panig ng Bucks, nakahugot ng 21 points, 16 rebounds at 9 assists kay Giannis Antetokounmpo.
Samantala, tinalo ng Houston Rockets ang Western Conference top team Los Angeles Lakers, 112-97, tampok ang 36 points ni James Harden.
Nagposte si Russell Westbrook ng 24 points habang may 23 markers si Eric Gordon para sa No. 4 seed na Houston. Kumolekta naman si Anthony Davis ng 25 points at 14 rebounds para sa Lakers at may 20-points si LeBron James.
Samantala, nakopo ni Los Angeles Clippers forward Montrezl Harrell ang NBA Sixth Man Award.
- Latest
