Vietnam SEAG events puwede pang madagdagan — Fernandez

MANILA, Philippines — Hindi pa pinal ang listahan ng mga sports events na idaraos sa 31st Southeast Asian Games sa Hanoi, Vietnam sa susunod na taon.

Kaya naman kumpiyansa si Philippine Sports Commissioner Ramon Fernandez na may tsansa pang maisama ang mga sports events kung saan humakot ang mga Pinoy athletes ng mga gold medals noong 2019 SEA Games.

“I dont think they have decided really on the number of the different sports that will be included there,” wika ni Fernandez sa PSC Hour. “We’re hoping that some of those sports that are not there initially ay maipasok naman.”

Kabuuang 450 events mula sa 36 sports ang inilista ng Vietnam para sa kanilang ikalawang pamamahala sa SEA Games matapos noong 2003.

Hindi isinama ng Vietnam SEAG Organizing Committee sa inisyal na listahan ng calendar of events para sa 2021 biennial edition ang arnis, skateboarding, obstacle course, jiujitsu, e-sports, sailing, soft tennis, triathlon, sambo, surfing, wakeboarding, windsurfing, modern pentathlon, baseball, duathlon, rugby, softball at squash na pinagkunan ng mga Pinoy bets ng 58 gold medals noong 2019 edition.

Ilan sa mga sports na isinusulong ni Philippine Olympic Committee (POC) president Abraham ‘Bambol’ Tolentino na maidagdag ay ang mga Olympic sports na triathlon, skateboarding at modern pentathlon pati na ang obstacle racing, sambo, esports, BMX cycling at arnis.

Humakot ang Team Philippines ng 149 sa kabuuang 530 gold medals na pinaglabanan sa 56 sports para angkinin ang overall crown ng 2019 SEA Games.

“It’s really a question of budget and preparation. That’s how we did it in the last SEA Games. So we’re not going to change our prog-rams,” ani Fernandez.

Nakatakda ang 2021 Vietnam SEA Games sa Nobyembre 21 hanggang Disyembre 2.