Pang-Olympics na performance ni Hidilyn Diaz
MANILA, Philippines — Nagreyna sa isang online competition si 2016 Olympic Games silver medalist Hidilyn Diaz nang bumuhat ng kabuuang 216 kilograms, ang 95 kg. ay sa snatch at 121kg. sa clean and jerk, sa kanyang video entry para banderahan ang women’s 59kg. division ng 2020 Eleikja Email International Lifters Tournament.
Itinuring ng tubong Zamboanga City ang nasabing online weightlifting competition na tila nasa 2021 Tokyo Olympics siya.
“I already imagined the crowd would be full of Filipinos cheering for my win in Olympics but because of the Covid-19 Pandemic the Olympics was moved to July 23-Aug 8, 2021, that imagination got blurred,” wika ni Diaz sa kanyang mga social media.
Ang video entry ni Diaz, nag-uwi ng silver medal noong 2016 Olympics sa Rio de Janeiro, Brazil, ay ipinadala niya sa Oceania Weightlifting Federation (OWF) sa torneong nilahukan ng mga partisipante mula sa 63 bansa.
Patuloy ang pagsasanay ni Diaz sa Kuala Lumpur, Malaysia para sa 2021 Tokyo Olympics na iniurong dahil sa coronavirus disease (COVID-19) pandemic.
Kumpiyansa ang Pinay lady weightlifter na makakalahok siya sa Tokyo Olympics kasama sina gymnast Carlos Edriel Yulo, pole vaulter Ernest John Obiena at boxers Eumir Felix Marcial at Irish Magno.
- Latest
