Didal puwede na rin
MANILA, Philippines — Ngayon ay maaari nang simulan ni Pinay skateboarding sensation Margielyn Didal ang kanyang pagsasanay para sa tinatarget na tiket sa 2021 Olympic Games sa Tokyo, Japan.
Ito ay matapos ilabas ng Philippine Sports Commission (PSC), Games and Amusement Board (GAB) at Department of Health (DOH) ang Joint Administrative Order (JAO).
Ang JAO ang maglalatag ng guidelines para sa physical at sports activities sa gitna ng kinakaharap na coronavirus disease (COVID-19) pandemic.
“For more than a year pasok siya sa Olympic slot,” wika ni Skateboarding and Roller Sports Association of the Philippines (SRSAP) president Carl Sambrano ukol kay Didal, ang 2018 Asian Games at 2019 Southeast Asian Games gold medal winner.
May pag-asa rin si 2019 SEA Games gold medalist Kiko Francisco na makadale ng tiket sa Tokyo Games.
“Kiko Francisco has been in and out of the Top 20 but that being said, may season 2 of Olympic Qualifier points that are still available,” dagdag ni Sambrano ukol sa tsansa ni Francisco.
Inihanda ni PSC Commissioner Ramon Fernandez ang pagte-training ni Didal, taga-Cebu City, sa Hoops Dome sa Lapu-Lapu City.
Dahil ang Cebu City ay nasa ilalim ng Enhanced Community Quarantine (ECQ) bunga ng coronavirus disease (COVID-19) pandemic ay limang buwan nang hindi nakapagsanay si Didal.
Kasalukuyang No. 14 si Didal, nagwagi sa Asian Skateboarding Championships 2020 Online Skate Lockdown Video Competition, sa World Skate official ranking para sa women’s street event.
Ayon sa World Skate, ang top three performers mula sa World Championships ang makakakuha ng Tokyo Olympics berth, habang ang 16 skaters ay may tsansa sa pamamagitan ng global rankings.
Bilang host country ay awtomatikong nabigyan ang Japan ng tiket sa quadrenniel meet.
- Latest
