Gusto man ni Fernandez ay wala siyang magawa

MANILA, Philippines — Gusto man ni Philippine Sports Commissioner Ramon Fernandez na muling buksan ang kanilang training facilities para sa mga national athletes at sa mga sasabak sa 2021 Olympic Games ay wala siyang magagawa.

Ito ay dahil sa coronavirus disease (COVID-19) pandemic na nakaapekto sa sports sa buong mundo.

“Honestly ang Panginoon lang ang nakakaalam kung kailan matatapos ito (pandemic),” wika kahapon ni Fernandez, ang Officer-in-Charge (OIC) sa PSC. “We can only speculate. We can never really tell. Paglabas ng bakuna siguro then we can start doing that.”

Ipinatutupad pa rin ng Inter-Agency Task Force (IATF) ang General Community Quarantine (GCQ) sa Metro Manila kung saan ipinagbabawal ang grupu-grupong phy-sical activities at mga contact sports.

Ang Ninoy Aquino Stadium at Rizal Memorial Coliseum sa Vito Cruz, Manila ay ginamit ng gobyerno para sa mga COVID-19 patients.

Dahil dito ay pinauwi ng PSC sa kanilang probinsya ang mga national athletes at coaches.

“We hope na may mahanap tayong ibang ve-nues. I hope the IATF will allow our athletes to train already,” wika ni Fernandez, ang four-time PBA Most Valuable Player.

Unang-una sa agenda ni Fernandez ay ang swab testing para sa COVID-19 lalo’t galing siya sa Cebu City na siyang epicenter ngayon ng pandemya.

Si Fernandez ang OIC ng PSC hanggang July 20 dahil nag-leave si PSC Chairman William Ramirez upang asikasuhin ang naoperahang asawa.