TNT laban sa Phoenix; NLEX kontra sa NorthPort ngayon
MANILA, Philippines – Ang unang panalo ang pag-aagawan ng apat na koponan sa 2020 PBA Philippine Cup.
Haharapin ng TNT Katropa ang Phoenix ngayong alas-4:30 ng hapon kasunod ang salpukan ng NLEX at NorthPort sa alas-7 ng gabi sa Smart Araneta Coliseum.
Ang five-peat champions na San Miguel ang unang naglista ng 1-0 record matapos gibain ang Magnolia, 94-78, sa pagbubukas ng torneo noong Linggo.
Ipaparada ng Tropang Texters ang 6-foot-8 na si Poy Erram, nagmula sa Road Warriors, sa kanilang pagsagupa sa Fuel Masters.
“We just have to play harder and smarter than our opponent,” sabi ni TNT Katropa coach Bong Ravena. “Our mind-set is, there is no weak team in this field.”
Makakatuwang ni Erram sina Jayson Castro, RR Pogoy at Troy Rosario laban sa Phoenix ni mentor Louie Alas.
“We watched their tune-up game films pero iyon nga ang problema ko, injuries,” ani Alas.
Samantala, babanderahan nina June Mar Fajardo ng San Miguel at CJ Perez ng Columbian ang mga pararangalang manlalaro sa inaabangang 2020 PBA Press Corps Awards Night sa Marso 16 sa Novotel Manila sa Araneta City.
Igagawad sa Beermen giant ang Order of Merit Award matapos humakot ng pinakaraming PBA PC Player of the Week citations noong 44th Season.
Tatanghalin namang Scoring Champion si Perez na susundan si legend Eric Menk bilang natatanging leading scorer ng PBA sa kanilang unang taon sa liga.
Kagagaling lamang ni Fajardo sa pagsikwat ng ikaanim na sunod na Season MVP award noong Linggo sa ginanap na Leo Awards kasabay ng pagbubukas ng 45th PBA Season sa Smart Araneta Coliseum.
Sa parehong pagtitipon ay pinarangalan si Perez bilang Rookie of the Year.
Nakasama rin ni Fajardo sa Mythical First Team at All-Defensive Team si Perez upang sementuhan ang kanilang kalibre bilang dalawa sa pinakamagagaling na manlalaro ng kauna-unahang professional basketball league sa Asya.
Ilan lamang ang Order or Merit at Scoring Champion sa 11 parangal na ibibigay ng PBA Press Corps sa ika-26 na pagdiriwang ng grupo katuwang ang Cignal TV.
Sina Tim Cone ng Barangay Ginebra at Leo Austria ng San Miguel ang kandidato para sa Baby Dalupan Coach of the Year award.
Ang mga ibang parangal ay ang All-Interview Team, D-League Finals MVP, Game of the Season, All-Rookie Team, Mr. Quality Minutes, Defensive Player of the Year, President’s award at Danny Floro Executive of the Year.
- Latest
