Blue Eagles dinagit ang PCCL crown
MANILA, Philippines — Lumipad nang mas matayog ang Ateneo Blue Eagles para patunayan na sila pa rin ang may pinakamalakas na collegiate program sa bansa.
Tinalo ng Blue Eagles ang San Beda Red Lions, 57-46, para angkinin ang titulo bilang national champions sa 2020 Philippine Collegiate Champions League (PCCL) kahapon sa Filoil Flying V Centre sa San Juan City.
Malaking follow-up ito para sa Ateneo na kinopo ang ikatlong sunod na korona sa UAAP na kinatampukan ng makasaysayang 16-0 sweep sa Season 81.
Ang Ateneo rin ang nanalo sa PBA D-League Aspirants’ Cup noong nakaraang taon.
Trumangko sa atake ng Katipunan-based team ang bagong lider na si SJ Belangel na kumana ng 10 point, 2 rebounds, 2 assists at 2 blocks.
Tumulong sa kanya si Ange Kouame na may 17 points at 17 rebounds, habang may 11 markers si Troy Mallilin.
Ito ang pang-limang PCCL championship ng Blue Eagles na pinakamarami sa kasaysayan ng liga.
- Latest