No. 8 jersey ni Simon ireretiro ng Magnolia
MANILA, Philippines — Matapos ang 17 season ay pormal na ireretiro ng Magnolia ang No. 8 jersey ni shooting guard PJ Simon.
Plano itong gawin ng mga Hotshots sa kanilang pagsagupa sa Ginebra Gin Kings sa kanilang ‘Manila Clasico’ sa Mayo 10 sa 2020 PBA Philippine Cup.
Ang 39-anyos na si Simon ay napili ng Sta. Lucia bilang 43rd overall pick noong 2001 PBA Rookie Draft.
Hindi siya pinapirma ng Realtors ng kontrata kaya nagdesisyon ang Cebuano shooter na maglaro sa nabuwag nang Metropolitan Basketball Association.
Matapos sa MBA ay sumabak naman si Simon sa namahinga na ring Philippine Basketball League bago bumalik sa PBA noong 2004 bilang isang free agent at isinuot ang uniporme ng Purefoods.
Sa kanyang paglalaro para sa prangksia ay nanalo si Simon ng walong PBA championships at walong beses napasama sa All-Star.
Dalawang beses siyang kinilala bilang Mr. Quality Minutes at noong nakaraang taon ay naghari sa PBA Three-Point Shoot Out.
Bubuksan ang 2020 PBA Philippine Cup sa Marso 8 sa Smart Araneta Coliseum.
Kaagad makakatapat ng San Miguel, hangad ang kanilang record na ikaanim na Philippine Cup title, ang Magnolia.
Maglalaro ang Beermen sa kabuuan ng torneo na wala si five-time PBA June Mar Fajardo dahil sa leg injury nito.
Sa Marso 11 ay magtutuos ang TNT Katropa at Phoenix at ang NLEX at NorthPort.
- Latest