Erram balik sa TNT Katropa matapos ang three-team trade
MANILA, Philippines — Natuloy na ang three-team, multi-player trade na nakasentro kay Gilas Pilipinas center Poy Erram matapos ang tawaran at diskusyo na tumagal ng dalawang linggo.
Inaprubahan kahapon ng PBA Commissioner’s Office ang nasabing palitan.
Base sa pinal na trade package, unang mapupunta si Erram mula sa NLEX patungo sa Blackwater kapalit nina Anthony Semerad at Rabeh Al-Hussaini sahog pa ang 2020 first at 2021 second round picks.
Sa puntong ito ay itutulak ng Blackwater si Erram papunta sa TNT Katropa kapalit ang dalawang big men na sina Yousef Taha at Marion Magat gayundin ang dalawang future first round picks 2021 at 2022.
Nauna nang inatasan ng PBA ang tatlong koponan na repasuhin ang kanilang trade package matapos ang hindi balanseng first draft nito.
Pagbabalik ito ng 6-foot-8 center na si Erram sa Tropang Texters na siyang pumili sa kanya bilang 15th overall pick noong 2014 PBA Rookie Draft.
Hindi siya nagtagal sa TNT Katropa hanggang sa mapunta sa Blackwater na pinaglaruan niya hanggang 2018 bago nalipat sa NLEX kapalit ang dalawang rookies na sina Abu Tratter at Paul Desiderio.
Isang two-time PBA All Star at 2018 Defensive Player of the Year si Erram na magiging malaking tulong sa Tropang Texters na matagal nang naghahanap ng solidong sentro upang umalalay kina RR Pogoy, Troy Rosario, Ray Parks, Jr. at Jayson Castro.
Ngayon ay lalong lumakas ang TNT Katropa na isa sa mga paboritong magwagi sa darating na 2020 PBA Philippine Cup, magbubukas sa Marso 8, kasama ang nagdedepensang San Miguel, Barangay Ginebra at Magnolia.
Sa panig naman ng NLEX na nawalan ng bigating frontline, ang beteranong si Al-Hussaini ang inaasahang sasalo sa naiwang puwesto ni Erram katulong pa si swingman Anthony Semerad na dadagdag sa firepower nina Kiefer Ravena, Jericho Cruz at Kevin Alas.
Ang Elite naman ay nakapagdagdag din lalo ng frontcourt sa pagdating nina Magat at Taha upang makatulong sina Carl Bryan Cruz, James Sena at Chris Javier gayundin ang palabang guards na sina Roi Sumang, Mike Tolomia, Mike Cortez at Desiderio sa ilalim ng bagong coach na si Nash Racela.
- Latest