Brownlee muling tinapik ng SMB-Alab
MANILA, Philippines — Lalong magliliyab ang Alab Pilipinas sa pagbabalik ng dating pambatong si Justin Brownlee para samahan sila sa natitirang bahagi ng 2019-2020 ASEAN Basketball League.
Kinuha ng Philippine ball club ang pamilyar na import upang palitan si Prince Williams na bigong makatulong sa anim na laro.
Pumalit noong nakaraang buwan kay Khalif Wyatt, may malamyang 9.6 points at 4.3 rebounds lamang ang ambag ni Williams na siyang dahilan ng kanyang pagkakasibak.
Inaasahang darating ngayon si Bronwlee sa bansa upang samahan sa pagsasanay ang koponan, ayon kay team owner Charlie Dy.
Lalaro na siya agad sa Miyerkules sa pagbabalik-aksyon ng Alab kontra sa Westports Malaysia Dragons sa MABA Stadium sa Kuala Lumpur.
Taliwas kay Williams, malaki ang maaasahan ng Alab kay Brownlee na kilala nang resident import hindi lamang para sa Ginebra sa PBA kundi gayundin sa ibang liga sa Asya.
Ito ang pagbabalik ng 31-anyos na manlalaro sa Alab na tinulungan niyang magkampeon sa ABL noong 2018 kasama ang katambal na si Renaldo Balkman.
Kagagaling lamang ni Brownlee sa kanyang ikaanim na tour of duty sa Ginebra na ginabayan niya sa PBA title sa likod ng mga averages na 29.0 points, 13. 6 rebounds, 7.2 assists, 2.0 steals at 1.4 blocks.
Bagamat natalo ulit siya sa karibal na si Allen Durham ng Meralco para sa Best Import award, nakuha niya ang ikaapat na titulo sa Ginebra matapos ang 4-1 na panalo ng Gin Kings sa katatapos lamang na PBA Governors’ Cup.
Sa Alab ay makakasama ni Brownlee sina Nick King at Sam Deguara.
- Latest
