Ravena, Animam at Aquino may award sa PSA
MANILA, Philippines — Gagawaran ng special awards sina Thirdy Ravena ng Ateneo, coach Pat Aquino at Jack Animam ng National University sa darating na SMC-PSA Annual Awards Night sa Manila Hotel Centennial Hall.
Hihirangin si Ravena bilang Mr. Basketball at tatanghaling Ms. Basketball at Coach of the Year naman sina Animam at Aquino, ayon sa pagkakasunod.
Dahil sa kontribusyon nina Animam at Aquino, ito ang unang pagkakataon na magbibigay ng Ms. Basketball at Coach of the Year awards ang pinakamatandang media organization sa bansa na naitayo noong 1949.
Ilan lamang ang tatlong special awards na igagawad ng PSA sa pangunguna ng Athlete of the Year na Team Philippines sa Marso 6 sa event na suportado rin ng Philippine Sports Commission, Milo, Cignal TV, Philippine Basketball Association, Rain or Shine at AirAsia.
Umukit ng kasaysayan sina Animam at Aquino sa nakalipas na taon tampok ang panibagong kampeonato ng NU Lady Bulldogs sa UAAP women’s basketball.
Winalis nila ang nagdaang 82nd season para sa ikaanim na sunod na titulo at pagpapatuloy ng 96-game winning streak simula noong 2014.
Naging bahagi rin ang dalawa ng makasaysayang double-gold harvest ng Gilas Pilipinas women sa 5-on-5 at 3x3 format ng 2019 Southeast Asian Games noong Disyembre.
Bukod pa rito ang malaking tulong nila para mapanatili ng bansa ang elite Division A status sa FIBA Women’s Asia Cup.
Si Ravena ay nakilala naman sa paggabay sa Ateneo sa 16-0 sweep sa UAAP.
- Latest