Bucks wagi sa 76ers

MILWAUKEE — Humakot si Giannis Antetokounmpo ng 36 points at 20 rebounds at gumamit ang Bucks ng mahigpit na depensa sa fourth quarter para talunin ang Philadelphia 76ers, 112-101.

Ito ang pang-limang sunod na laro na kumamada si Antetokounmpo ng 30-plus points at 15-plus rebounds at ika-14 nga-yong season.

Mas minabuti ng Milwaukee na huwag sumalang sa mga trade kumpara sa ibang koponan.

“I think a lot of teams are getting players so they can play against us, so they can guard us better,” sabi ni Antetokounmpo. “But I think we’re the best team in the NBA; we have the best record in the NBA.

Ito ang pang-12 panalo ng Bucks sa huli nilang 13 laro a ipinalasap sa  76ers ang ikaapat na road game loss.

Nagdagdag si Khris Middleton ng 20 points at 7 rebounds habang may 14 markers, 8 boards at 6 assists si point guard Eric Bledsoe para sa Bucks.

Kumolekta si Philadelphia center Joel Embiid ng 19 points at 11 rebounds.

Sa Los Angeles, kaagad nakahugot ng kontribusyon ang Houston Rockets mula sa bagong player na si Ro-bert Covington habang humataw naman si Russell Westbrook ng 41 points para sa kanilang 121-111 paggupo sa Lakers.

Tumapos si Covington, nakuha ng Houston sa isang trade, na may 14 points at 8 rebounds para sa kanyang debut.

Iniskor ni Westbrook ang kanyang ika-20,000 career point at sumama kina LeBron James at Oscar Robertson bilang mga tanging players sa NBA history na nagposte ng 20,000 points, 7,000 assists at 6,000 rebounds.

Nagtala lamang si James Harden ng 14 points para sa Rockets na gumamit ng ‘small ball’ laban sa Lakers.

Sinamantala ito ng Los Angeles sa likod ni Anthony Davis ngunit nakabawi ang Houston mula sa four-point deficit sa pamamagitan ng 19-5 atake sa dulo ng fourth period tampok ang dalawa sa apat na triple ni Covington.

Nakuha ng Rockets ang veteran shooter mula sa Minnesota Timberwolves sa isang four-team trade.

Naglista si Davis ng 32 points at 13 rebounds, habang kumolekta si James ng 18 points, 15 assists at 9 rebounds para sa Lakers.

Sa Portland, humakot si Damian Lillard ng 26 points para sa 125-117 panalo ng Trail Blazers laban sa San Antonio Spurs.