Davao, Bacoor ‘di natinag

BiÑan, Laguna, Philippines — Napanatili ng Davao Occidental at Bacoor ang kanilang 1-2 spots sa South division sa papalapit na pagtatapos ng eliminasyon ng Chooks-to-Go MPBL Lakan Season noong Huwebes ng gabi dito sa Alonte Sports Arena.

Nilapa ng Davao Occidental Tigers ang Biñan City Luxxe White Krah Heroes, 72-66 para hablutin ang No. 1 berth at iwanan ng Bacoor Strikers na umiskor naman ng 79-68 panalo sa Iloilo United Royals.

Nakahugot ang Tigers ng 15 points mula kay June Mocon para talunin ang Heroes habang may 12 markers si Chester Saldua para sa kanilang 25-4 record.

Umiskor naman si Mark Pangilinan ng 16 points at may 10 points at 10 rebounds si Michael Mabulac para sa panalo ng Bacoor (24-6) kontra sa Iloilo.

Samantala, sinandigan ng Makati Super Crunch si Jeckster Apinan para takasan ang General Santos Warriors sa overtime, 91-90.

Humugot si Apinan ng 10 sa 12 points ng Makati sa extension, tampok dito ang buzzer-beating lay-up para talunin ang GenSan ni star guard Mikey Williams.

Tinapos ng Super Crunch (22-8) ang kanilang two-game skid at diniskaril ang pagpasok ng Warriors (16-12) sa playoffs sa South.